8 feb. 2012

Pu Anünmapuche ñi piel ñuke kewon antü mu





21 de febrero
MAPUDUNGUAEN, IÑCHE KA MAPUCHENGEN

Fillpüle mapu, kom tripantü mu kawintukey pu che ñi ÑUKE KEWON mu, febrero 21 konchi antü. Iñchiñ ka koniyiñ tüfachi dungun mu, nentuel taiñ Epuchi Fütrake Kewon Trawun rupal chi noviembre küyen, elkünuyiñ tüfachi dungu, feymew tripaletuy Chile mapu mu, Bolivia ka Puelmapu mu, feymu ka müley taiñ feypial tüfa:

Inchingetuy kamapu wechekeche ñi weychan Abul Barkat em, Rafiquddin Ahmed em ka Shafiur Rahman em, tüfayengün layngün petu ingkatumeken ñi kewon, febrero küyen mu, 21, 1952 (kiñe warangka, aylla pataka kechu mari epu tripantu puwün); ingkameken Bangla dungun ñi oficial dungungeal Pakistan mapu mu, tralkatungelu layngün karüke chumpiru ñi mekel. Welu tüfachi weychan keyufi pu che nietual Bangladesh nación. Feymu UNESCO 1999 tripantü mu, üytufi tüfachi antü NUKE KONWON antüngetuam, fewla kom pu che, kom mapu mu tukulpameketuiñ tüfachi antü.

ÑUKE KEWON mu ta chengetukey che, ütrüftukungele iñchiñ taiñ ütruftungetun tayiñ chetrokingenon. Iñ kewon mew ta rakiduwamkeiñ, lelikeiñ taiñ azmapu, wewpitukeiñ, nentukeiñ tayin azmongen. Tüfachi Chile mapu mu müley fill ÑUKE KEWON, müley tichi AYMARA, RAPA NUI, LICAN ANTAY, QUECHUA, KAWESCAR, YAGAN, SELKNAM ka iñ MAPUZUGUN filke üytun mu. Kom tüfachi ÑUKE KOWON wünelefuy wingka kewon mu, petu ñi akunon mu pu español, ka doykefuy kake mapu mu, tawantinsuyu, koyawsuyu, Puelmapu mu, fewla Perú, Bolivia, pingetuy.

Mülenmu tayiñ dungun mangelpefiñ kom pu che, tayiñ misawal ingkatuam mapudungun, allkütungetuam taiñ dungun fillpüle, wüñoweftual taiñ kewon, doy müntunmagelayaiñ, eluwlayaiñ pu che, doyngelayay katripache ñi kewon iñchiñ mu. Kimeltuaiñ epurumekewon, ka epurume kimün; ka akule tichi censu mapudunguken piaymi. Faliwtuayiñ pu che ñi kisungünewün, ñi pepiluwam chumiechi ñi ingkayal ñi mapuzungun. Ka müley ñi piwkentukual ñi dungun lof mu, trawun mu, ka ñi ingkayafiel küdaw mew, waria mew, radio mew, fill püle.

Trawutuaiñ taiñ yafuluwam in kewon mu, chewngele rume, müley tamün norümam chumiechi taiñ kudawal faliwtungetuam iñ ñuke dungun. Müley tami feypial -kimeltungetuay ñuke kewon pu puchikeche chillkatuwe ruka mu, feypipuaymi Ministerio de Educacion mu; ka nentuaymi trawun chew nütramkayam pu füchakeche, kom pu che; ka wuñotual tayiñ mapuche tukutun, tayiñ purun, iñ iyael, ülkantual, wewpitual, koyawtual, epewtual, kom kimün entual kewon mu.

Tüfachi antü wüñoweftuay taiñ mapudungun, wüñoweftuay taiñ azmongen, ka iñ normongen, feymu müley taiñ fütra kawintual pu lamngen.

Tañi mülen mu, tañi mülekefel mu, ka ñi mületual kake tripantü tayiñ mapudungun, tüfachi mapu mu, yewekelayaiñ chumkawnurume taiñ dungun, taiñ admongen. Tüfa ta ülmen kimünngey, külfunke lonkgo mew ta mületuay, wilüfküleay iñ rakiduam mu, iñ mongen mu, ka taiñ weychan mu.

INGKAYAIÑ TAIÑ MAPU KA INGAKAYIÑ TAIÑ MAPUDUNGUN RUMEL!!!
MARICHI WEW!!!

No hay comentarios.: